वाग्मती प्रदेशमा मात्रै ६३१ जनाको कोरोना संक्रमणबाट मृत्यु

वाग्मती प्रदेशमा मात्रै ६३१ जनाको कोरोना संक्रमणबाट मृत्यु

वाग्मती। कोरोना भाइरस सङ्क्रमणबाट काठमाडौं उपत्यकासहित वाग्मती प्रदेशमा हालसम्म ६३१ जनाको मृत्यु भइसकेको छ।

वाग्मती प्रदेश, सामाजिक विकास मन्त्रालयका अनुसार प्रदेशमा एक लाख १७ हजार १९७ जनामा कोरोना भाइरस सङ्क्रमण पुष्टि भएको छ।

मन्त्रालयको कोभिड–१९ का प्रवक्ता डा पुरुषोत्तम सेढाईंका अनुसार कूल सङ्क्रमितमध्ये ९८ हजार ५५९ जना उपचारपछि निको भएर घर फर्किसकेका छन्। प्रदेशमा कोरोना सङ्क्रमणबाट निको हुने दर ८४ प्रतिशत रहेको उनको भनाइ छ।

मुलुकका कूल कोरोना सङ्क्रमितमध्ये वाग्मती प्रदेशमा ५० प्रतिशत छ। कोरोनाको सङ्क्रमणबाट सुरक्षित रहन सरकारले निर्धारण गरेको मापदण्ड पालना गर्नुपर्ने उनको भनाइ छ।

हेटौँडा उपमहानगरपालिका–५ की ६४ वर्षीया एक महिलाको कोरोना सङ्क्रमणबाट शुक्रबार आफ्नै घरमा मृत्यु भएको छ। उनलाई गत कात्तिक १८ गते कोरोना पृष्टि भएको थियो।

- ५ मंसिर २०७७, शुक्रबार १४:५९ मा प्रकाशित