राष्ट्रिय महिला लिग

राष्ट्रिय महिला लिग

७ फागुन, काठमाडौं । विभागीय टोली नेपाल पुलिस क्लब राष्ट्रिय महिला लिगमा तेस्रो भएको छ । शुक्रवार भएको आफ्नो अन्तिम खेलमा उदयपुरको चौदण्डीगढी नगरपालिकालाई १०-० को फराकिलो अन्तरले पराजित गर्दै पुलिसले तेस्रो स्थान पक्का गरेको हो । १२ खेलबाट पुलिसले १८ अंक जोड्यो । चौदण्डीगढीले भने सबै १२ खेलमै हार व्यहोर्‍यो । एपीएफ र आर्मीबीच शुक्रवारै लिगको अन्तिम खेल हुँदैछ ।

एन्फा कम्प्लेक्स सातदोबाटोमा भएको खेलमा पुलिसलाई जित दिलाउन निरु थापाले ह्याट्रिकसहित चार गोल गरिन् । यस्तै निर्मला विकले ह्याट्रिक गरिन् । सुनकली राई र अमृता जैसीले एक गोल गरिन् । एक गोल उदयपुरका खेलाडीले आत्मघाती गरेका थिए । निरुले खेलको तेस्रो छैटौं र ११ औं मिनेटमा गोल गर्दै ह्याट्रिक पूरा गरेकी हुन् । उनले २८ औं मिनेटमा व्यक्तिगत चौथो गोल गरिन् । निर्मला विकले ३६ औं, पहिलो हाफको इन्जुरी टाइम र ८६ औं मिनेटमा गोल गर्दै ह्याट्रिक पूरा गरिन् ।

६१औं मिनेटमा सुनकला राईले गोल गरिन् । ३० औं मिनेटमा चौदण्डीगढीकी सुजाता राईले आत्मघाती गोल गरेकी थिइन् । अमृता जैसीले इन्जुरी टाइममा गोल गरिन् । पहिलो चरणमा पुलिसले चौदण्डीगढीलाई ६-० ले पराजित गरेको थियो । १२ खेलबाट ५ जित, ३ बराबरी र ४ हारसहित १८ अंक जोडेको पुलिसले वालिङ नगरपालिका र विराटनगर महानगरपालिकालाई पछि पारेको हो । १७ अंकसहित वालिङ चौथो र विराटनगर १६ अंकसहित पाँचौ भएको छ ।

पुलिस एपीएफसँग दुवै खेलमा पराजित भएको थियो भने वालिङ र विराटनगरसँग एक-एक खेलमा हार व्यहोरेको थियो । आर्मीलाई भने दुवै खेलमा बराबरीमा रोकेको थियो । यस्तै चौथो भएको वालिङले ३ लाख पाउनेछ । चन्द्रपुर ९ अंक जोड्दै छैटौं स्थानमा रह्यो ।

- ७ फाल्गुन २०७७, शुक्रबार १३:४१ मा प्रकाशित